Mat 26 | ZomZIV | STEP | Jesu in hih thu teng a gen khit ciangin a nungzuite kiangah,

Matthew 26

Jesu Langpangte Sawmsimna

1 Jesu in hih thu teng a gen khit ciangin a nungzuite kiangah, 2 “Na theihsa bangun tu zawh ni nih khit ciangin Paisan pawi hong tung dinga - Mihing Tapa kilhcip dingin kipia ding hi,” ci-in a gen hi.

3 Tua ciangin Caiaphas kici tulpipa innpi-ah siampi makaite le mipite’ upate a kikhawm uh hi. 4 Tua ciangin amaute in Jesu mansim a thahlup ding a sawmsim uh hi. 5 Ahi hangin, “Mipite hong so kha ding ahi ciangin Pawi sungah hih kei ni,” a ci uh hi.

Bethany ah Jesu Sathau Kinilh

6 Bethany a Simon kici Miphakpa innah Jesu a om laitakin, 7 a manpha mahmah sathau namtui suangngo thawl khat tawi-in numei khat ama kiangah a pai hi. Sabuai tungah kingama a om laitakin tuanu in a lutungah a sathau namtui a buak hi.

8 Nungzuite in a muh uh ciangin a lungkim kei uh hi. Amaute in, “Pammaih lel hi lo hiam? 9 Hih sathau namtui man tampi-in zuakin a sum mizawngte piak tuak zaw hi,” a ci uh hi. ^a

10 Jesu in a theih ciangin amaute kiangah, “Hih nu bang dinga buaisak na hi uh hiam? Amah in kei tungah a kilawm na hoih khat a hih khin hi. 11 Mizawngte tawh note na omkhawm den ding uh a, ahi hangin kei tawh na omkhawm den kei ding uh hi. 12 Ka pumpi sathau nam-tui hong buah ciangin kei kivui nading a bawlkhol ahi hi. 13 Thutak kong geninah, hih lungdamna-thu a kihilhna leitung mun khempeuh ah amah a kiphawk gige nadingin ama hihsa thu zong a kigen ding hi,” a ci hi. ^b

Jesu Lehhek ding Judas Thukim

14 Tua ciaingin sawm-le-nihte lakah khat - Judas Iscariot kici pa siampi makaite kiangah va pai a, 15 “Amah note khutah hong pia leng, kei bang nong pia ding uh hiam?” ci-in a dong hi. Tua ciangin amaute in sumtang sawm thum a sehkhia uh hi. 16 Tua huna kipan Judas in amaute khutah Jesu a piak theih nading hun hoih a ngak gige hi. ^c

Topa’ Nitak-an

17 Silngo sawh loh Anlum Pawi ni masa pen ni-in Jesu kiangah nungzuite va pai uh a, “Paisan-pawi an nek nading koi lai-ah na bawlkhol le ung na deih hiam?” ci-in a dong uh hi. ^d

18 Amah in, “Khuapi sunga mi khat kiangah, ‘Siapa in: “A kisehsa ka hun tung dek ta hi. Ka nungzuite tawh na innah Paisan-pawi kong bawl ding uh hi, ci hi,’ va ci un,” ci-in a dawng hi. 19 Tua ciangin nungzuite in Jesu cih bangin Paisan-pawi bawl nading a bawlkhol uh hi. ^e

20 A nitak ciangin, Sawm-le-nihte le Jesu sabuai ah a kingam uh hi. 21 Amaute in an a nek laitakun Jesu in, “Thutak kong geninah, note lakah khat in kei hong lehhek ding hi,” a ci hi. ^f

22 Amaute dah mahmah uh a, a ban banin ama kiangah, “Kei hi buang kei ning maw Topa?” a ci ciat uh hi.

23 Jesu in, “Kei tawh ankuang a sawk khawmpa in kei hong lehhek ding hi. 24 Ama thu a kigelhsa bangin Mihing Tapa a pai ding hi. Ahi hangin Mihing Tapa a lehhekpa in gimna nak thuak na zen in cia! A piang vet lo hileh ama adingin hoih zaw ding hi ven,” a ci hi.

25 Tua ciangin amah lehhek ding pa Judas in, “Kei hi buang kei ning maw Rabbi?” a ci hi. ^g

Jesu in, “Hihi, nang na hi hi,” ^{▼▼26.25 Ahikeh “Nang na gen khinta hi”} ci-in a dawng hi.

26 Amaute in an a nek laitakun, Jesu in anlum la a, lungdam koin balkhama, a nungzuite pia-in, “Hih ka pumpi ahi hi, la unla ne un,” a ci hi. ⁱ

27 Tua khit ciangin hai la a, lungdam koin, amaute pia-a, “Hih hai-in dawn kim ciat un. 28 Mi tampi mawh mai nadinga kibuakhia, thukhunna ^{▼▼27.28 Khutgelh pawlkhatah a thak} ka sisan ahi hi. 29 Ken kong geninah, ka Pa gam sungah note tawh a thaka ka dawn khawm mateng, tu-a kipan lenggahzu ka dawn nawn kei ding hi,” a ci hi. ^k

30 Amaute in biakna la a sak khit uh ciangin Olive Vum ah a pai uh hi.

Peter Nial ding Jesu in Genkhol

31 Tua ciangin Jesu in amaute kiangah:

“‘Tuucingpa ka sat dinga, tuuhonte a kithehthang ding hi,’ ^{▼▼26.31 Zec. 13:7}
ci-a kigelhsa bangin tu zan mahmah in kei hangin na vekun na puk ding uh hi. ^m

32 Ahi hangin ka thawh kik khit ciangin note mai-ah Gililee gamah ka na pai ding hi,” ci-in a gen hi. ⁿ

33 Peter in, “Nang hangin mi khempeuh a puk zongin kei ka puk ngei kei ding hi,” ci-in a dawng hi.

34 Jesu in, “Thutak kong geninah, tu zan mahmah ak khuan ma-in thumvei nong kitheihmawhbawl ding hi,” a ci kik hi.

35 Ahi hangin Peter in, “Nang tawh sihkhawm nading ahi zongin kong kitheihmawhbawl ngei kei ding hi,” a ci teitei hi. Tua mah bangin nungzui dangte in zong a ci ciat uh hi. ^o

Gethsemane

36 Tua khit ciangin Jesu a nung zuite tawh Gethsemane kici munah pai uh a, amaute kiangah, “Hua lai-ah pai-a thu ka nget kalin hih lai-ah na tu un,” a ci hi. 37 Amah in Peter le Zebedee tapate gel tonpih a, tua ciangin amah dah lua-in a lungmang hi. 38 Tua ciangin amaute kiangah, “Dah luatna in sih nading zah dongin hong zen hi. Hih lai-ah na om unla, kei tawh kigalging khawm un,” a ci hi. ^p

39 Tawmkha pai lai-in lei-ah boka, “Pa aw, ahi theih leh hih hai tawh hong kipelhsak in. Ahi zongin kei deih bang hi loin nangma deihna bang hizaw hen,” ci-in thu a ngen hi. ^q

40 Tua ciangin nungzuite kiangah pai kika, amaute a na ihmu khin uh hi. Jesu in Peter kiangah, “Note in nai khat sung nangawn hong kigalginpih zo lo na hi uh hiam? 41 Khem na na thuak loh nadingun thungenin kigalging un. A kha a ut hangin pumpi thanem hi,” a ci hi. ^r

42 Amah a nihveina va pai kika, “Pa aw, hih hai kei dawn loh a kipelh thei lo ahileh, nangma deihna bang hi ta hen,” ci-in thu a ngen hi.

43 Amaute ihmut suak lua uh ahi manin amah a pai kik ciangin a ihmut laitak uh a tuak leuleu hi. 44 Tua ciangin amaute nusia-in paikhia leuleu a, a nget ngei mah a thumveina a ngen hi.

45 Tua khit ciangin nungzuite kiangah pai kik-a, “Note ihmu lailai in tawlnga lailai na hi uh hiam? En un, Mihing Tapa mawhneite khut sungah a kilehhek hun naita hi. 46 Tho un, pai ta ni! Kei hong lehhekpa hih lai-ah hong pai ta hi!” a ci hi.

Jesu Kiman

47 Tua banga a paupau laitakin, Sawm le nihte lakah khat Judas a tung hi. Amah tawh, siampi makaite le mipite’ upate in a sawl, namsau le khetbuk tawi mihonpi tawh a tonkhawm hi. 48 Tua a lehhekpa in, “Ka nap penpen Jesu hi ding hi; tuapa man pah un,” ci-in amaute tawh lim a kilahkholhsa bangin 49 Jesu kiangah Judas paipah a, “Rabbi dam maw!” ci-in amah a nam hi.

50 Jesu in, “Lawm aw, hih dinga nong paina hih in,” ^{▼▼26.50 Ahikeh “Lawm aw, bang hang hong pai na hiam?”} ci-in a dawng hi.

Tua ciangin mihonte in Jesu nehphei uh a, lencipin a man uh hi. 51 Tua laitakin Jesu pawlte khat in ama namsau mana, dokin tulpipa nasempa sat-a, a bil a satkhia hi. ^t

52 Jesu in ama kiangah; “Na namsau a paii ah siat in. Namsau zangte namsau mah in si ding hi. 53 Ka Pa ko thei lo dingin hong ngaihsun na hi uh hiam? Ko leng ka deih banga ka zat theih ding van sawltak legion sawm le nih sanga tamzawte thakhatin hong puakpah ding hi. 54 Tua bang hileh hih bang tektekin piang ding hi, ci-a Laisiangtho gensa bangci tangtun thei ding ahi hiam?” a ci hi. ^u

55 Tua laitakin Jesu in mihonpite kiang ah, “Kei man dinga namsau le khetbuk tawh nong kuan uh, kumpi langpangte makai ka hi hiam? Nisimin biakinnpi tualte ah thu ka hilh laitakin nong man kei uh hi. 56 Ahi hangin kamsangte gelhsate a tangtun theih nadingin hih bang teng a piang ahi hi,” a ci hi. Tua ciangin nungzuite khempeuh amah nusia-in a tai uh hi. ^v

Sanhedrin Mai-ah

57 Jesu a mante in thukham siate le upate omkhawmna mun tulpi Caiaphas inn a tun uh hi. 58 Ahi hangin Peter in tulpipa inntual dong kihal simsimin Jesu a zui hi. Bang thu piang ding hiam, cih thei nuamin inntual ah lut-a a cingte tawh a va tukhawm hi.

59 Siampi makaite le Sanhedrin buppi in Jesu a thah theih nadingun a langah zuau teci a zong uh hi. 60 Zuau teci pang tampi a pai uh hangin thu-a santak ding thukho a mu zo kei uh hi. ^w

A tawpna ah nih va pai uh a, 61 “Hih pa in, ‘Pasian biakinnpi susia in nithum sungin ka lam kik thei ding hi,’ ci hi,” ci-in teci a pang uh hi. ^x

62 Tua ciangin tulpipa dingin Jesu kiangah, “Dawng lo ding na hi hiam? Na lang khata hihte teci pannate bangci bang ahi hiam?” ci-in a dong hi. 63 Ahi hangin Jesu a dai dide hi. ^y

Tulpipa in ama kiangah, “Nang Pasian Tapa Christ ^{▼▼26.63 Ahikeh Messiah;tg. 68 ah zong} na hi hiam hong gen in, ci-in a nungta Pasian ah tomlo-in nang kong sawl hi,” a ci hi. ^aa

64 Jesu in, “Himah ing, na cih bangin ka hi hi. Ahi hangin note khempeuh kiangah kong gen hi: Mailam hunah Mihing Tapa, Thahat Pa’ taklamah tu-in meii tungah hong tuangsuk na mu ding uh hi,” ci-in a dawng hi. ^ab

65 Tua ciangin tulpipa in a puansilhte balkeka, “Pasian a gendai zo hi! Teci dang kul nawn ding ahi hiam? En un, Pasian a gendaina kam na za zo uh hi. 66 Bang na ci ngaihsut uh hiam?” a ci hi. ^ac

Amaute in, “Amah sihsak taak hi,” ci-in a dawng uh hi. ^ad

67 Tua ciangin amaute in a maitang cilphih uh a, a khuttum uh tawh a tum uh hi. Adangte in a pang bengin, ^ae 68 “Christ aw, nang kua’n hong su hiam, hong gen dih in,” a ci uh hi.

Peter in Jesu Kitheihmawhbawl

69 Inntual ah Peter a tut laitakin nasem numei khat a kiangah va pai-in, “Nang zong Galilee mi Jesu tawh na kipawl hi,” va ci hi.

70 Ahi hangin amah in, “Na thu gente ka thei kei hi,” ci-in amaute khempeuh mai ah a nial hi.

71 Tua ciangin inntualkong lam manawhin a pai leh numei dang khat in amah mu-a, mipite kiangah, “Hih pa Nazareth mi Jesu tawh kipawl hi,” a ci hi.

72 Amah in, “Tua mipa ka thei kei hi,” ci-in tomlo-in a nial kik hi.

73 Tawlkhat khit ciangin tua lai-a dingte Peter kiangah va pai uh a, “Ama pawlte lakah khat na hi taktak hi; na aw suah in zong kithei hi,” a va ci uh hi. ^af

74 Tua ciangin amah le amah kihamsiat-in, “Tuapa ka thei peuhmah kei hi!” ci-in amaute mai-ah a kiciam hi.

Tua khit phetin ak a khuang hi. 75 Tua ciangin, “Akkhuan ma-in kei thum vei nong kitheihmawhbawl ding hi,” ci-a Jesu gen Peter in a phawk hi. Tua ciangin amah a pualamah pusuak a, kah cihtakin a kap hi. ^ag